د حاتم شرف الدين دكتور بكلية الزراعة جامعة القاهرة
– إلا قولي يا عمدة
– هاه قول يا ولا
– هي أيه حكاية الفِرة اللي دايرة في النحل دي
– فِرة أيه يا ولا
– أنا عارف..أهم بيقولوا الفِرة دايرة في نحل البلد كولاته واللي نحله يجيله الفِرة يقول عليه يا رحمن يا رحيم
– أيوه ايه اللي بيحصل يعني
– النحل من دول يبقى كويس وزي الفل وهووووب مرة واحدة تلاقيه في النازل والصندوق فضي والنحلة من دول مش قادرة تصلب طولها شوية وتلاقي الصناديق فضيت ومفيهاش صريخ ابن يومين
– اه ه ه ه ه ه قولتلي…. دي حاجة لو عرفتوها تبقوا عُمد……. ده يا سيدي خلطة كده بتيجي للنحل مع بعضها مرة واحدة والناس بيسموها CDC او بالعربي يعني اختفاء طوائف النحل
– تختفي ….. تختفي أزاي يعني عليها عفريت هئ هئ هئ
– اتحشم يا ولا …..تختفي يعني نفتح الخلية متلاقيهاش ومحدش عارف بتروح فين…. دي بقى تحصل بعد ما تدق على الراس طبول وانت غلبان مش واخد بالك فاروا ونوزيما مع شوية فيروسات حلوين كده جايين مع الفاروا
– يا حلاوة بس كده
– لا يا غلباوي مش بس عندك كمان حبة مبيدات مع شوية مجالات كهرومغناطسية زي اللي خارجة من التلفون المحمول وسلوك الكهربا…….. كوووووووول ده مع بعضه خلى النحل يجوض ويقول جاااااااااي فأما يطلع يسرح وميرجعش يموت من بره بره يإما يقول أني مش قاعد هنا وياخد بعضه ويهج من الخلية
– ايه يا عمدة طب ما انا عارف طبعا أومال…….. بس الحل يعني نعمل ايه
– لأ يا وله تعمل كتير كتير اوي تعالج نوزيما لو جاتلك او وقائي بمنقوع الشيح… والفاروا خليك مع حامض الفورميك
استمر مع الليمون والقرفة والزعتر في التغذية عشان ترفع المناعة وبعدين يا خويا اختار منطقتك حاسب من المبيدات وابعدعن الطريق الرئيسي وسلوك الكهربا
وربنا يسترها ……
– يا رب يا عمدة
